Blog Archives
ORAS
Ikaw nga ba ang simula at hangganan
Daang puno’t dulo’y hindi matanawan
Dagdag pa’y bugtong kang walang kasagutan
Napakahiwaga mong palaisipan
Ang mga paham pinilit kang sukatin
Bawat galaw mo segundo kung tawagin
Ikaw nga ba talaga’y pwedeng bilangin
Isa ka bang daanan na pwedeng lakbayin
May tangkay kang patuloy paiikutin
Pag-ikot na ‘di namin pwedeng pigilin
Pag-ikot na dapat ay aming habulin
Tunay ngang kami’y kawawa mong alipin
Sa kamay mo kagandaha’y kumukupas
Inuubos mo ang taglay naming lakas
Buhay ma’y parang dahon mong nilalagas
Sa itinakda mo’y wala kaming ligtas
Bakit kasi nagtakda ka ng hangganan
Dapat bang ang lahat ay may katapusan
Pagikot ng kamay mo minsa’y pigilan
Saya’y h’wag palampasin sa kasukdulan
Paglipas mo ay pwede bang pabagalin
Kabataa’y h’wag agad palilipasin
Kabantuga’y pagtagalin mo ang ningning
Ganda’t lakas h’wag kagyat pakukupasin
Pabalik sa balag mo kami’y pagapangin
Panahong nagdaan aming dadalawin
Mga maling nagawa ay buburahin
Masasayang sandali muling nanamnamin
Bintana ng bukas sana’y iyong buksan
Nang ang mangyayari aming matanawan
Malungkot na tadhana’y maiiwasan
Hayaang buhay sa saya matuldukan
KUWENTULAAN
Sina Ching at Banjun ay tubong Cagayan
Sila’y magkababata at magkaybigan
Hiwalay na pumanday ng kapalaran
Ngunit isa’t-isa’y ‘di kinalimutan
Nang sa Facebook sila ay nagkatuntunan
Buong pananabik silang nagkuwentuhan
Kuwentuhang pinadaloy sa taludturan
Ay siyang pinagmulan ng KUWENTULAAN
Simple lamang hinabi nilang mga tula
Walang sukat ngunit dulo’y tugma-tugma
Sila ma’y ‘di batikang mga makata
Pinagpaguran bawat tulang kinatha
Apat na buwan ng tula’y nagpalitan
Sabik na sabik na sila’y nagkwentuhan
Maraming bagay silang pinagusapan
Maging ng payo sila ay nagpalitan
Pagka-gradwyet ko ng elementarya, mula sa Cagayan, kung saan kami ng kababata at kaybigan kong si Banjun (Verbo S. Cabus, Jr. alyas Tibong Cagayano) ay isinilang, ay lumipat ang pamilya ko sa lalawigan ng Batangas. Doon na kami naninarahan kaya’t mula noon ay hindi na kami nagpangita ni Banjun.
Nagulat na lamang ako nang noong ika-27 ng Enero, 2010 ay may nag-tag sa akin sa isang tula na naka-post sa Facebook. Ang nag-post ay si Banjun na matagal na palang panahon na naninirahan sa London kasama ang kanyang pamilya. Ang tula’y tungkol sa akin. Patula rin nang ako’y sumagot. Doon nagsimula ang halos apat na buwan na palitan namin ng tula. Karamihan ng aming mga akda’y nasulat noong Pebrero at Marso ng taong iyon.
Nagkuwentuhan kami sa patulang paraan. Mahirap pero pilit naming pinanidigan. Katuwaan lang. Tinawag n’ya itong TULATORYAHAN at ang bansag ko naman dito ay KUWENTULAAN.
Ang kapatid niyang si Vivian (Bianang) at kapitbahay na si Vidang (Vida) ay napatula rin at paminsan-minsang sumingit sa aming kwentuhan.
Karamihan sa mga tula namin ay sumusunod sa malayang taludturan…ang mga dulo’y pilit namin pinagtugma ngunit walang sukat na sinunsunod. Mangilan-ngilan sa mgat ula nami’y merong sukat at tugma.
Kahit pareho kaming hindi taal na Tagalog at ang pagkatha ng tula’y libangan lang ay sinuong namin ang hamon na magkuwentuhan sa patulang paraan.
Isang Pagninilay
Sa bundok ng Golgotha’y umakyat
Pinasan ang krus hirap na hirap
Ikatlong hapon nang maganap
Pagkakatawang taong nagwakas
Kasalanan ay koronang tinik
Sibat na tumusok sa gilid
Kay Hudas tayo ay ang naghatid
Nang sa Mesiya s’ya ay humalik
Hinayaang si Hudas magtaksil
Di ba’t kusang loob nagpakitil
Utang nati’y sa Kanya siningil
Ang utang nating mga nagtaksil
Di ba’t dugo n’ya’y ipinanlinis
Sa pagkatao nating madungis
Kusang loob buhay ibinuwis
Nang tayo’y makapiling sa langit
Huminto’t magnilay kahit saglit
Lumuhod tayo’t mata’y ipikit
Sa Panginoon tayo’y sumandig
Walang hanggan ang Kanyang pag-ibig
TURUAN AKO
Ayaw maniwala sa bulung-bulungan
Na may iba ka na’t ako’y iiwanan
At nagkandarapa kita’y pinuntahan
Umaasang ito’y pasisinungalingan
Niyakap mo ako’t patawad hiniling
Nagmakaawa kang kita’y unawain
Wika’y nalusaw pag-ibig mo sa akin
Nang ikaw ay kanyang hagkan at yakapin
Mundo ko’y gumuho sa aking nadinig
Nanlumo ako’t mga tuhod nanginig
Ngunit di magawang sa iyo’y magalit
Masakit ma’y inunawa kitang pilit
At ako’y nagsumamong bago lisanin
Lumapit ka’t mahigpit akong yakapin
Habang ako’y yakap ibulong sa akin
Paano mabuhay nang ‘di ka kapiling
Turuan akong mamuhay nang mag-isa
Bago ka lumisa’t sumama sa kanya
Nasanay akong pag-gising sa umaga
Ngiti mo’y sisilay pagmulat nang mata
Mahirap na tanggaping ako’y iiwan
Ngunit hindi na kita kayang pigilan
Basta’t turuan mo akong kita’y kalimutan
Bago tuluyan na kamay ko’y bitawan
(Inspired by Michael Bolton’s “How Am I Supposed To Live Without You”)
Nang Ako’y Ngitian
(Inspired by Air Supply’s “Two Less Lonely People In The World”)
Buwan sa gabi’y nakatago sa ulap
Araw sa umaga ay ayaw sumikat
Laging bigo at sa lungkot nasasadlak
Ayaw nang umasa’t dala nang mangarap
Ayaw sa kabigua’y muling malugmok
Bakit nanaising sa luha’y malunod
Mundo ko sa pag-ibig ‘di na iinog
Puso marahil ‘di na muling titibok
Ngunit nakita ka’t ako’y nginitian
Tumigil ako at kita’y pinagmasdan
Ngiti mong nagkukubli ng kalungkutan
Parang nag-aanyayang kita’y damayan
Atubili ma’t maraming agam-agam
Ngumiti rin ako’t kita’y nilapitan
Nang kamay mo’y mahigpit na hinawakan
Balikat ko’y masuyo mong sinandalan
Sa malambot mong pisngi ako’y humalik
Ang tugon mo rito’y yakap na mahigpit
Sa puso’y tumibok muli ang pag-ibig
Minithing ligaya sa wakas nakamit
Mga puso nating bihasang mabigo
Nilaro ng tadhana bago nagtagpo
Nang kita’y matagpuan saka natanto
Sa ‘yo nakalaan itong aking puso
My Names and Pseudonyms
My name usually elicits giggles and buzz
Oftentimes it arouses questions and laughs
With MASSULINE ANTONIO… What’s the big fuzz?
None really, just read properly, is all that I ask
Into four syllables, my name be divided
Think it this way… MAS-SU-LI-NE, please be guided
MASSU in MASSULINE be carefully read
Following the pronunciation key at the end… (mäsū)
And the LI be not read as li as in Bruce’s Lee
But as lī in lie, as inventing a story
The NE , make it unique and a little naughty
Just follow the sound of ni in the word bikini
With different nicknames I was identified
From my initials, some have called me MAD
From Antonio, with TONY, I was also tagged
Believe me, even with MUSSI, I was marked
Sir Mad, Dr. Ligaya, at work, my epithets
Oh my, with too many nicknames, I was perplexed
When still a child my playmates had me labelled
They would call me DADDU, and I’l be angered
In a previous workplace in my country
People said they find my name a little funny
Because it’s tiring to call my name in its entirety
DR. JOY… yes, indeed, that was how they called me
But of all those monikers I got called with
There’s only one I would consider so sweet
I would feel so delighted whenever I hear it
That is CHING, music to my ears indeed.
“Nom de plume” I also used in writing
When my identity as writer I am hiding
“The Fabulist” when anthropomorphizing
Animals for human follies I am attacking.
I parodied Quijano De Manila of Nick Joaquin
Quinano De Ilocandia as alias I am using
But in most instances the one I have been adopting
It’s HARDPEN the best of all my pseudonyms
Source: My Names and Pseudonyms
Tula
Pinagsama-sama ko ang aking mga tula ayon sa mga kategoryang pinili ko. Ang mga tula kong may temang pag-ibig ay aking inipon sa pahinang may pangalang TIBOK habang ang mga tulang tumatalakay sa bayan, pagkamamamayan at mga isyu patungkol sa pulitika ay sa BAYAN MUNA. 
Ang mga paboritong kong love songs sa English eh ginanawan ko rin ng tula at mababasa ang mga ito sa TINULANG TUGTOG.
Sumulat din ano ng mga tula ukol sa kung ano-anong bagay at mga isyu o mga paksa na hindi tumatalakay sa pag-ibig at sa bayan. Pinagsama-sama ko ang mga ito sa SAMU’T-SARING TULA.
May mga sinulat rin akong satirikong tula na bumabatikos sa mga sa palagay ko’y ugaling ‘di maganda ng mga taong nakapaligid sa akin at ng mga taong nakakasama ko sa trabaho. Ito ay parunggit ngunit hindi ako nagmamalinis dahil maaring angkin ko rin ang mga ugaling hindi ko nagugustuhan sa iba kaya’t kapag nababasa ko ang aking mga tulang ito’y nagbubulay-bulay din ako. Pinagsama-sama ko ang mga tulang ito sa pahinang pinangalanan kong SA PILING NG MGA HAYOP. Bahala na ang babasa kung ano sa tingin nila ang kahulugan ng salitang hayop sa sa bahaging sa pangalan ng pahinang ito.
Lumikha rin ako ng pahina para sa mga tula kong sinulat habang ako’y nakasakay sa jeep o insipired ng mga experiences ko sa pagsakay sa jeep. Matatagpuan ang mga tulang ito sa pahinang binansagan kong HETO NA ANG JEEP
May mga sinulat rin akong APATANG TALUDTOD (Quatrains). Nag-eksperimento rin ako sa isang uri ng tula na tinawag kong PAKWELANG TALUDTURAN na sa unang tatlong taludtod ay parang seryoso ang tinatalakay subalit sa pang-apat (clincher) ay ang sundot na patawa.
‘Source: Tula
M.A.D. LIGAYA
M.A.D. L I G A Y A 