Mga Tanong
Ilang “Napoles” nga kaya ang umikot
Umaligid sa katakam-takam na “pork”
Ilang “Napoles” kaya ang nakidukot
Tumulong kay “YOUR HONOR” sa pangungurakot
Kung may ibang “Napoles” ang ibig sabihin
May iba pang mandarambong dapat hulihin
“Honorable” na magnanakaw ay hanapin
Sa ginawang krimen dapat panagutin
May mga punong bayan bang di naulingan
Nang kaldero ng “pork” kanilang hinawakan
Sino sa kanila baya’y di ninakawan
Sino sa kanila ang pwedeng sandigan
Marami ang katumbas na silid-paaralan
Ang perang ninakaw nila sa ating kaban
Kalsada at tulay sana’y nadagdagan
Kung ‘di talamak sa gobyerno ang nakawan
Taon-taon “pork” sa kanila’y inihahain
Kanya-kanya ng gayat mga pinuno natin
Taba at laman paghahati-hatiin
Buto’t balat ang ititira sa atin
Leave a comment
Comments 0