Ang Loro
(Sa Piling Ng Mga Hayop – 4)
Heto akong muli’t kayo’y kukwentuhan
Tungkol sa isang HAYOP sa kagubatan
Kilalaning mabuti… siya’y iwasan
At nang kayo’y kanyang hindi mapagtripan
HAYOP na ngayo’y ating pagkukuwentuhan
Isang LORONG kilala sa katabilan
Ano mang bagay kapag kanyang nalaman
Ay kangyang ibo-broadcast sa buong bayan
Nakakainis itong LORONG matabil
Makati nitong dila hindi mapigil
Mga dapat itago pilit ire-reveal
Sa pakikipagdaldala’y ayaw tumigil
Ibang mga ibong kasama sa kawan
Ugali niya’y labis pinagtatakhan
At ang tanong – Ano ba ang pakinabang,
Kung ang buhay ng iba’y paguusapan?
Ano ba kasi ang kanyang mahihita,
Kapag pilit ikakamot makating dila?
Ano ba kasi ang kanyang mapapala,
Kung katabilan niya’y makakasira?
Hindi naman siguro AHAS ang LORO
Para kaybigan niya’y ipagkanulo
Siya ba ay TALANGKA na sobrang tuso
Nang makaangkat tatapakan ka sa ulo
Lubhang kakaiba ang HAYOP na LORO
Kasi’y mapagkakamalan mong HUNYANGO
Mahirap hulaan tunay na kulay nito
Kakampi? Katunggali? – Nakakalito!
Anila ay talagang natural lamang
Na heto ngang LORO ay may kadaldalan
Ang akala siguro’y simpleng bagay lang
Kung lihim ng iba’y ipagwawagwagan
Leave a comment
Comments 0