Bibliya… sa mabuting balita’y hitik
Instrumento ng kapayapaan at pag-ibig
Ibahagi nang sa Maylikha kapwa’y manalig
Siya, hindi ikaw, sa kanila’y magtutuwid

Salita ng Lumikha ay dapat nating gamitin
Upang pasalamatan Siya’t purihin
Huwag gamitin upang husgahan at sindakin
Mga kapwa mo taong hindi kayang mahalin

Ang Lumikha ay mapagmahal… hindi malupit
Siya’y mapagtawad ‘di mapagtanim ng galit
Kaya salita Niya ay huwag mong ginagamit
Upang manghusga ng kapwa at magparunggit

Huwag itong gagamiting pambato sa kagalit
Baka sa iyo lumatay salitang ihahaplit
Utos sa atin ng Amang nasa langit
Puso’t isipa’y dapat puspos sa pag-ibig

Kung sa bibliya ikaw nga ay maalam
Huwag mo na itong ipangalandakan
Paniniwala ng kapwa… dapat igalang
Pananampalataya nila’y huwag yurakan