Bago kantang Ingles isa-isang tutulain
Sa iisang akda muna’y pagsama-samahin
Sa isang kwento ay pagdudugtong-dugtungin
At sa balag ng pag-ibig doo’y pagapangin

“She,” s’yempre dalaga, itatangi’t sasambahin
Binata’y susumpang s’ya lamang ang mamahalin
Wika n’ya ay “Please Don’t Ask Me,” huwag nang tanungin
Kung bakit labis-labis ka niya kung ibigin

Suwerte mo’t “Come What May” ay handa kang tanggapin
Ngunit bakit sa iba nagawa pang tumingin
Nasaktang damdamin sa iba na rin ibinaling,
Wika mo’y “Can’t Cry Hard Enough,” na sising alipin

“When I Was Your Man,” wika mo matapos magtaksil …
Nagsisi nang irog iniwan ka’t itinakwil.
Gumanti ang “Delilah” labis din kung maningil
Ngayon sa pagluha mata mo’y hindi mapigil.

Sigaw ng binata “Here I Am,” na ‘di ka malimutan
“How Am I Supposed To Live Without You,” s’ya nga’y turuan
Dagdag pang “I’d Rather” ‘di bale nang mahirapan
Basta’t pumayag ka na kayo’y magkabalikan

Subalit nang tuluyang hindi magkabalikan
Malungkot ding binibini kanyang natagpuan
Dahan-dahang naghilom puso nilang sugatan
“Two Less Lonely People” mundo’y naghilom ng tuluyan.

Tinula Kong Kanta