Hardpen, 12-27-10

Nami-miss ko ‘mate ang ating tulaan
Gawin pa rin natin ito kahit paminsan-minsan
Sa ngayon kita ay kukuwentuhan
Ukol sa lugar na aking tinitirhan…

Simpleng subdivision aming pamayanan
“Villa Verde” ang taglay nitong pangalan
Sariwa ang hangin, paligid luntian
Tanaw pa  ang ilog sa di kalayuan

Kaya’t dito minabuting manirahan
Pagkahanapbuhay kay sarap uwian
Mapapahinga ang pagal mong katawan
Mapapanuto nagulo mong isipan

Dito sa amin ay mayroong samahan
Ng homeowners at mga nangungupahan
Bilang miyembro ako’y  nakipagtulungan
At naging pangulo ng di kalaunan

At ang lugar na inakala’y paraiso
May mga taong baluktot ang prinsipyo
Kaya’t isip di masyadong mapanuto
Manakanaka’y sumasakit aking ulo

Dito kasi marami ring mga usapin
Bilang pangulo ay dapat kong ayusin
Mga reklamo dapat kong dinggin
Mga usaping heto aking iisa-isahin

May mga nag-alaga hayop na kambing
Sa loob ng subvision pagagalain
Bakuran ng may bakuran dadapurakin
Halamanan ng iba siyang kakainin

May-ari nama’y napapakiusapan
Alagang kambing  huwag pakakawalan
Aming subdivision ay hindi pastulan
Alaga’y itali na lang sa kabukiran

Nakakawalang aso dito’y isyu rin
Natatakot mga tao baka kagatin
Basurang sinisinop baka kalkalin
Aso sa bakura’y di dapat palabasin

Meron din dito na mahilig kumanta
Kahit walang okasyon bibirit sila
Sa volume ng videoke mabibingi ka
Kapakanan ng kapitbahay di alintana

Nang ang katwiran nila ay mapakinggan
Ano man daw gawin sa kanilang bakuran
Wala daw sino mang puwedeng makialam
Batid daw nila kanilang karapatan

May mga kapitbahayan rin na dito
Motor  binago pinaingay ang tambutso
Tunog ng motor nila’y nakakatuliro
Kapag umandar na’y takpan ang tenga mo

Tama ba naman ang bigay na katwriran
Sa tambutso daw nila ay di maiingayan
Kung nagrelamo’y di pinagawa ang tahanan
Sa tabi ng kalsadang kanilang daraanan

Oo nga at ating naiintidihan
Na ano mang gawin sa kanilang bakuran
Ito ay bahagi ng kanilag karapatan
Kahit sino di puwedeng makialam

Oo nga’t karapatan nilang gawin
Tambutso ng motor ay paingayin
Pera naman nila kanilang gagastusin
Kaya nga’t hindi sila puwedeng pigilin

Ngunit mukhang kanilang nakalimutan
Na may limitasyon alin mang karapatan
Gawin at sabihin alin man ang magustuhan
Tiyakin lamang na walang masasagasaan

Karapatan ng bawat isa sa atin
Mag-alaga ng hayop kung gugustuhin
Ngunit ang nagmamay-ari dapat tiyakin
Na alagang hayop walang sisirain

Karapatan ng kahit sino ang kumanta
Hangga’t mamaga mga lalamunan nila
Tiyakin lamang na walang ngang iba
Na nabubulahaw ang pamamahinga

Ang lumikha ba ng ingay ay karapatan din
Bakit tambutso ng motor dapat  paingayin
Subdivision parang race track kung ituring
Katahimikang hanap huwag sanang basagin

Opisyal man ako o hindi ng asosasyon namin
Ganitong mga bagay ‘di dapat palampasin
Batid kong meron mga nagtatampo sa akin
Sa bandang dulo sana sila’y makaunawa rin