Blog Archives
BUNTIS
Ina’y nabagabag nang anak tumangis.
“Aking anak bakit ka naghihinagpis?”
“Sorry po… batid kong kayo’y magagalit
Ako’y nagkasala… ako po ay buntis.”
“Okay lang yan anak, h’wag mong problemahin.”
“Ganun inay… ‘di n’yo ako sasampalin?
Wala lang po? ‘di n’yo na tatanungin
Kung sino ba ang nakabuntis sa akin.”
Kinurot ng ina ang anak sa singit.
“Aray naman inay… kurot n’yo masakit.”
“Huwag nang uliting pangaraping mabuntis
Kasi Roberto wala ka namang matris.”
Ang Boyfriend Ni Bunso
Isang hapon sa bahay ni pareng Kulas
Mga anak na dalaga’y kinausap.
“Kumusta mga anak?” – kanyang bungad
Tatlong dalaga’y sabay-sabay nag-thumbs up.
Ang tatlong dalaga’y ating kilalanin
Ate sa magkakapatid ay si Lambing
Ang ditse’y Ngiti kung kanilang tawagin
Bunso’t sanse ang palayaw nama’y Hinhin
“Nag-boyfriend na kami.” Wika ng panganay.
“Huwag ka pong magalit sa amin itay
Mga boyfriend namin mahal kaming tunay
Asahang kami’y nasa mabuting kamay.”
Dagdag ni Lambing – “BF ko’y makabayan.”
Tumango ang Kulas… mukhang nasiyahan.
Lalo na nang si Ngiti siya’y bulungan –
“Sweetheart ko po ’tay makapamilya naman.”
“Papa ko po’y maka-Diyos at madasalin!”
Taas noong sabi ng bunsong si Hinhin.
“Good job anak… s’ya ba’y kakilala namin?”
“Opo! Siya’y pari sa simbahan natin.
Ang Pasahe
Bandang hapon pauwi na si mang Teban
Galing sa opisinang pinapasukan
Sa isang kanto’y nag-abang ng sasakyan
At isang jeep kaaagad s’yang hinintuan.
Dumukot si mang Teban ng ibabayad
Problema’y wala halos baryang mahagilap
Tig-lilimang daan kasi perang hawak
Apat na piso lang ang baryang nahanap.
Sa salamin ng jeep ang mama’y natingin
Sa mata ng driver meron s’yang napansin.
“Aha!” Wika n’ya, “Ang driver pala’y duling.”
Akala’y lutas na ang kanyang suliranin.
Ang apat na piso’y doble kung titignan
Kasi nga duling ang driver ng sasakyan
Kaya’t walong piso ang kakalabasan
Iyon ang pasaheng dapat n’yang bayaran.
Ang kwatro’y iniabot bago bumaba
Ngunit wika ng driver, “Kulang po mama.”
Ani mang Teban, “Walong piso na ‘yan ah.”
At sagot ng driver – “Kayo po’y dalawa.”
May Tatlong Bampira
May tatlong bampirang magkakabarkada,
Isang gabi’y nagpasyang magkita-kita.
Nang kwentuha’y matapos, nagutom sila
Sa suking restaurant nagpasyang magpunta.
Naunang umorder bampirang mayaman
Wika sa waiter, “Fresh cow’s blood ako’y bigyan,
Puso ng baka’y ihawin, extra-rare lang,
Ako’y gutom na kaya’t iyong bilisan.”
Sumunod naman bampirang ordinaryo –
“Dinuguang baboy nga… meron ba kayo?”
Half-cooked lang! For my drinks? Ah… dugo ng pato!
Tumango ang waiter bilang tugon nito.
Nang dukhang bampira sa waiter tumingin
Wika nito’y, “Hot water lang ang sa akin,
Kasi…heto… may napulot akong napkin,
Kaya’t tsaa na lang ang aking iinumin.
Happy Teachers’ Day Po Mam!!!
Kayo po ay muli kong kukwentuhan,
Paksa natin ngayo’y tungkol sa holdapan,
Kwento na nasagap sa isang huntahan,
Nang mga kapwa guro’y naka-umpukan.
Nang kwentong holdap ko’y kanilang nadinig –
Aba’y may isa ng tawa’y bumunghalit.
Isang kwento daw ang samagi sa isip,
Nang magsimula siya kami’y tumahimik.
Isang gabi guro niya sa kolehiyo,
Sumakay daw sa may Taft papuntang Recto,
May mga kawatan… bilang daw ay tatlo,
Sumigaw – “Walang kikilos holdap ito!”
Ibang pasahero syempre’y nataranta,
Ngunit ang guro mukhang naka-relax pa,
Holdapan yata ay nakasanayan na,
Inihanda na relo’t kanyang pitaka.
Madaling-madali ang mga kawatan,
Mabilis na mga gamit ay sinamsam,
At nang ang guro na ang nilalapitan,
Isang holdaper kasama’y pinigilan.
Ang wika niya, “Brod, balato ko na si mam!”
“Magaling kong guro noon sa elem ‘yan,”
Dugtong pa ay, “Hi! Good evening po madam.”
“Ako po ba ay inyong natatandaan?”
Natamemeng guro’y tumango na lang,
Ibang pasahero’y nagulumihanan,
At bago bumaba ang mga kawatan,
Wika ng isa – “Happy teachers’ day po mam!”
Ang Holy Water
Si lola Basyang ay isang biyuda,
Si aling Luring nama’y isang soltera,
Sila’y sanggang dikit, laging magkasama –
Silang dalawa’y tunay na magbarkada.
Sa kanilang baryo ay may isang kapilya
At doon, si Lola Basyang ay nagpunta.
“Luring… dalian mo, ako’y nandito na.”
Aniya sa kaybigan nang tumawag s’ya.
“Nandyan na kumare, nasa jeep na ako,
Heto kasing driver… mabagal magpatakbo.
AYY… hayan binilisan, narinig ako.
Sige mareng Basyang, pababa na ako.”
“Mama para… mama dyan na lang sa tabi.”
Di huminto ang driver, tila yata nabingi.
Sumigaw ang Luring…”PARA NA SABI!!!”
At biglang pumreno, driver na narindi.
Nagkabusiksikan mga pasahero
Napalakas yata sobra ang pagkakapreno
Si aling Luring hiyang-hiya’t dismayado
Katabing lalaki’y hawak sa pundiyo.
“Ay dalag!” Bulalas ni aling Luring.
“Hindi dalag… cobra po yan kung tawagin.
Aray! Teka po… h’wag ninyong sakalin,
Bitawan n’yo na’t baka kayo tuklawin.”
Buamaba ang hiyang-hiyang aling Luring,
Tahimik na umusal ng panalangin
“Ako’y patawarin Diyos na mahabagin,
Kamay kong nagkasala ay lilinisin.”
Dali-dali itong pumasok sa kapilya
“Ay ang aling Luring nandito na pala.”
Wika ni lola Basyang nang siya’y makita.
“O… aanhin mo iyang bitbit mong tasa?”
“O…bakit? Ang holy water sinalok mo?”
“Mareng Basyang, nagkasala ang kamay ko
May lalaking nahawakan ko ang pundiyo
Kaya’t holy water ang panlinis dito.”
Pagkahugas… si aling Luring lumuhod.
Ang Basyang dahan-dahang tasa’y dinukot,
At pasimpleng ng holy water sumalok
Ipinasok sa bibig… siya’y NAGMUMOG.
Ang Tatay Ni Juan
Excited si Juan nang ama’y kinausap –
“Itay, sa wakas ay aking nang nahanap
Iibigin, ko’t pakakasalang dilag
Bukod sa maganda’y ubod pa ng sipag.”
Nangiti si mang Pedro anak niyakap
“Yes! Magkakaapo na ako sa wakas.”
At tinanong ng ama ang kanyang anak –
“Eh Juan, sino ba itong bago mong sweetheart?”
“Siya po’y si Helen anak ni aling Bebang
Sila’y nakatira sa kabilang kanto lang.”
“Anak, si aling Bebang bang nagpapakwan?”
“Opo itay… ‘yong madalas ninyong bilhan.”
“Naku anak, ako sana’y iyong sundin
Iyang si Helen ‘di mo pwedeng ibigin”
“Bakit po itay? Inyo ngang liwanagin.
“Anak si Helen… sa akin din nanggaling.”
“Itay… si Helen pala’y aking kapatid!
Talagang sa babae kayo’y malupit.
Si aling Bebang kayo ang nakabuntis,
Di ka nasindak sa mister niyang pulis.”
“Si Helen ay pilit kong kakalimutan
Si Joy na lang po ang aking liligawan
Mukha’y maamo’t maganda ang katawan
Siya’y anak ng kumpare ninyong si Teban.”
“Hep! Hep! Hep! Ikaw nga anak eh tumigil
Anak… kay Joy eh huwag ka sanang mang-gigil
Bunga din s’ya nang aking pagtataksil
Nang si kumare ay hindi ko napigil.”
“Ang liligawan ko na lang eh si Gracia,
Nag-iisang anak ni aling Maria.”
“Naku hijo, sorry, pero pasensya na,
Si Gracia’y galing rin sa aking semilya.”
Naglasing ng todo ang dismayadong Juan
Mga kapatid kasi ‘di pwedeng ligawan
Kaya’t ang nanay niya’y kanyang nilapitan.
“Inay…ako po ba’y pwedeng pagpayuhan?”
“Tatlong dilag… aking pinagpipilian
Isa sa kanila nais kong ligawan
Ngunit si itay ako ay pinigilan
Siya daw ang tatay ng mga naturan.”
“Inay si itay ika’y pinagtaksilan
Kataksilang aking pinagdudusahan.”
“Tama na anak pag-iyak ay tigilan
Itong sasabihin ko’y iyong pakinggan.”
“Si Helen at Gracia pwede mong ligawan
Tanging si Joy lang ang dapat mong iwasan.”
Eh bakit po inay? Pwede bang malaman?
“Anak… tunay mong ama’y si pareng Teban.”
M.A.D. LIGAYA
M.A.D. L I G A Y A 