Aking salaming nakasabit sa dingding,
Samo ko ay laging ibulong sa akin,
Na dungis ng iba bago  ko punahin,
Uling sa mukha ko muna ang linisin.

Turuan mo nga akong maghunos-dili,
Na h’wag perpekto kung tignan ang sarili.
Pagsabihan ako na h’wag magmapuri,
Isiping ako ma’y pwedeng magkamali.

Sabihin mong wala akong karapatan
Na kapwa ko tao ay aking pulaan,
Dahil ako ma’y maraming kakulangan –
Pagkatao ko’y tadtad sa kapintasan.

Sa tuwing kita’y lalapitan sa dingding,
Paalalahanan ako oh salamin
Na sariling buhay ko’y dapat ayusin
At h’wag buhay ng may buhay ang punahin.

Sana’y tulungan mo akong unawain,
Na oras akin lamang sasayangin
Kung kakulangan ng iba’y laging papansinin
At pagkakamali nila ang laging hahanapin.

Pilitin mo namang ituro sa akin
Na galit sa puso’y hindi ko kimkimin,
Na inggit sa limot lagi kong ilibing,
Na kapwa-tao’y lagi kong unawain.

Oh salamin ako’y paalalahanan
Na dapat saliksiki’y tamang katwiran
Na kung tamang landas… aking dadaanan
Panginoong Diyos ako’y gagabayan.

(Mula sa kantang “When I Was Your Man” ni Bruno Mars)

Kamang higaan ko biglaang lumuwag
Walang katabi’t sa aki’y yumayakap
Kanta natin noon na dulot ay galak
‘Pag ngayon nadinig ako’y naiiyak

Tuwing pangala’y sumasagi sa isip
Magugunita naglaho mong pagibig
Walang magagawa kundi ang pumikit
Luha’y aagos lugami ang dibdib

Kung yakap sa iyo’y aking hinigpitan
Kung panahon ko sa iyo’y inilaan
Kung ng bulaklak kita ay hinandugan
Baka sakaling ako’y ‘di mo iniwan

Nakalimutang kita’y pahalagahan
Pinabayaa’t hinayaang masaktan
Natiis na magdusa’t mata’y luhaan
Kaya’t nagpasya ka na ako’y iwanan

Nang mawala ka kita’y pilit hinanap
Ninais kong sa iyo’y magpaliwanag
Nanalanging hindi pa huli ang lahat
Tanggapin muli ako at mapatawad

Sa pasyalan natin kita’y pinuntahan
Nagbakasaling doo’y matagpuan
Sa nasumpungan labis akong nasaktan
Yakap ka ng iba’t masuyong hinahagkan

Mukhang “poet” lang po  ako pero hindi ko masasabing bihasa  ako sa pagsulat ng tula. Ang totoo nga po’y hindi naman ako taal na Tagalog. Ang aking ama’y isang Batangueño at ang ina ko nama’y Ilocana-Ibanag.

Libangan ko lang talaga ang paghabi ng tula. Mahilig lang akong sa taludtura’y maglaro’t maglakbay at pilit na mga pintig ay tinutugma’t pinapantay. Minsan naman ay sa dalampasigan ng malayang taludturan ako bumabaybay.

Hindi po talaga ako makata. Mahilig lang akong gumamit ng mga talinghagang ang babasa’y kayang talusin hindi upang sila’y lituhin kundi upang sa kariktan ng tula’y sa lugod sila’y lunurin.

Natuto lang ako ng kaunti kung papaanong ang mga saknong sa tayutay ay habiin. Kahit naman papano ang pagwawangis ay kaya kong gawin.  Natutuhan ko rin naman kahit kaunti kung papaano pagapangin ang aking damdamin sa bawat taludtod at hayaang laman ng puso ko’y sa pantig tumibok.

Kahit naman papaano’y nakakasulat ako ng tula at pinipilit  kong aralin ang mga dapat kong matutuhan sa larangang ito umaasang balang araw ay hindi na akong magmukhang “poet” lamang kundi tawagin na akong totoong makata.

Hindi pa ako tapos sa aking pag-aaral. Ang nasa kong matuto’y hindi magmamaliw hangga’t  puso ko’t isipan ay kayang sabay  na umindak sa kumpas ng aliw-iw.

— 0 —

Karahimihan sa mga tula ko’y “lalabindalawahin” at ang mga saknong ay apat na linya. Gumagamit din ako ng malayang taludturan, walang sukat pero sinisikap kong lagyan ng tugma sa dulo.

Pinagsama-sama ko ang aking mga tula ayon sa mga kategoryang pinili ko. Ang mga tula kong may temang pag-ibig ay aking inipon  sa pahinang  may pangalang TIBOK  habang ang mga tulang tumatalakay sa bayan, pagkamamamayan   at   mga   isyu  patungkol sa pulitika  ay sa BAYAN MUNA. 

Ang mga paboritong kong love songs sa English eh ginagawan ko rin ng tula  at mababasa ang mga ito sa TINULANG KANTA.  Paano ba naman, ang mga kaybigan ko, tuwing ako’y naririnig kumanta sa English ay naririndi at sinasabing tulain ko na lang. 

Sumulat din ano ng mga tula  tungkol sa kung ano-anong bagay at mga isyu o mga paksa  na hindi tumatalakay sa pag-ibig at sa bayan. Pinagsama-sama  ko ang mga ito sa SAMOT SARING TULA.

May mga sinulat rin akong satirikong tula na bumabatikos sa mga sa palagay ko’y ugaling ‘di maganda ng mga taong nakapaligid sa akin at ng mga taong nakakasama ko sa trabaho.  Ang mga tulang ito  ay parunggit ngunit hindi ako nagmamalinis dahil maaaring angkin ko rin ang mga ugaling hindi ko nagugustuhan sa iba kaya’t kapag nababasa ko ang  mga tulang ito’y nagbubulay-bulay din ako. Pinagsama-sama ko ang mga tulang ito sa pahinang pinangalanan kong SA PILING NG MGA HAYOP. Bahala na ang babasa kung ano sa tingin nila ang kahulugan ng salitang HAYOP sa pangalan ng pahinang ito.

Lumikha  rin ako ng pahina para sa mga tula kong sinulat habang ako’y nakasakay sa jeep o insipired ng mga experiences ko sa pagsakay sa jeep. Matatagpuan ang mga tulang ito sa pahinang binansagan kong HETO NA ANG JEEP.

May mga sinulat rin akong APATANG TALUDTOD (Quatrains). Nag-eksperimento rin ako sa isang uri ng tula na tinawag kong PAKWELANG TALUDTURAN na sa unang tatlong taludtod ay parang seryoso ang tinatalakay subalit sa pang-apat (clincher) ay ang sundot na patawa. At dahil mahilig din akong magpatawa eh gumawa ako ng mga tulang ang layon ay magkwento ng nakakatawa. Ang mga tulang naturan ay nasa TINULANG JOKES.

May mga tula rin akong nagpapahayag ng pagkilala sa ating Dakilang Lumikha. Pinangalang kong PAGNINILAY ang sulok na ito ng aking website.