Winika ni Balagtas ating balikan
Pag-ibig daw labis makapangyarihan
Kapag pinana’t sa puso’y tinamaan
Utak ay lumilipat sa talampakan

Wika nila’y kapag tumibok ang puso
Pupungay ang mata tutulis ang nguso
Lutang at tulala parang tinotoyo
Nagiging pasaway tumitigas ang bungo

Kapag umibig lahat ay sasawayin
Mga bilin ni nanay ‘di papansinin
Upang ang kasintahan ay makapiling
Mataas man ang bakod ay aakyatin

Basta’t ang pag-ibig ay masunod lamang
Basta’t kasama mahal na kasintahan
Tatakas at lahat ay tatalikuran
Kakalimutan maging mga magulang

Animo’y bawal na gamot ang pag-ibig
Kapag tinamaan ka’y t’yak na maaadik
Harangan ka man ng sibat o ng kampit
Bisig ng sinta mo’y yayakaping pilit

Kaya’t kapag umibig ay kaiingat
Hangin ang pag-ibig ika’y ililipad
Minsan ay dadalhin ka sa alapaap
Minsan ay sa batuhan ka ibabagsak