Category Archives: Tula
BILBILingly Yours
O BILBIL pakiusap ako’y tantanan
ISANG PAGTANGGAP:
ISANG PANGAKO:
TUGON NG BILBIL MO:
Hindi Magmamaliw
Taludturan ay muli kong lalakbayin
Pintig ng puso’y pagtutugma-tugmain
Talinhaga nito pilit mong talusin
Sa kanyang kariktan sarili’y lunurin
Mga saknong sa tayutay hahabiin
Maraming pagwawangis dito’y gagamitin
Hindi dahil nais isip mo’y guluhin
Nang ito’y maarok puso ang gamitin
Damdaming dumaloy sa bawat taludtod
Ay laman ng pusong sa pantig tumibok
Kung isip ang gagamitin ‘di mo maaarok
Tanging sa puso damdami’y iindayog
Mata mo sana’y ipikit aking giliw
Sumayaw tayo sa kumpas ng aliw-iw
Sabihin man nilang ako’y isang baliw
Pag-ibig sa iyo’y hindi magmamaliw
Maging Akin Ka Sana
Lumapit ka sana’t kamay ko’y abutin
Ibubulong kong tanong iyong sagutin
Maaari bang ikaw ay maging akin?
Maari bang ako’y iyong ibigin?
Tanging sa ‘yo nakatuon ang paningin
Sa isip hindi kita kayang burahin
Pumayag ka sanang ika’y maging akin
Habang nabubuhay kita’y sasambahin
Lumapit ka na at ibulong sa akin
Batid ko na meron kang nais sabihin
Mga ngiti mo’y huwag gamiting tabing
Upang itago ang sinaktang damdamin
Pahintulutan sana na kita’y mahalin
Tulungang nakaraa’y iyong limutin
Bumaong tinik sa puso’y bubunutin
Ulap sa langit mo’y aking hahawiin
Mapait na kahapon huwag nang balikan
Heto ang palad ko mahigpit mong hawakan
Masuyong luha mo’y aking pupunasan
Mithing ligaya kita’y hahandugan
Maging akin ka ang tanging panalangin
Pag-ibig sa puso muling pasikatin
Pahintulutan sanang kita’y makapiling
Payagan akong ika’y paligayahin
(Mula sa kantang “Be My Lady” ni Martin Nievera)
TAG-ULAN
Umuulan
Walang puknat
Bubong na’y halos mabutas
Umuulan
Maghapon…magdamag
Kalsada’y naging dagat
Sila’y namamangka…hindi naglalakad
Ula’y walang patid
Hangi’y kay lamig
Ngunit sa bubong nagsumiksik
Bahay kasi’y nilamon ng tubig
Tubig-bahang galing sa langit
Sa kalangitang ating ginalit
PAGHILUMIN
Heto ako’t sa pighati’y nalulunod
Sa bigat ng lumbay puso ko’y nadurog
Ngayo’y nagsusumamo’t naninikluhod
Bumalik ka sana’t pawiin ang lungkot
Pagbalong ng luha ko’y iyong pigilin
Bisig mo’y ibuka at ako’y yakapin
Andap sa puso mo’y hipa’t pag-alabin
Damdaming kong sinugata’y paghilumin
Sakit mong idinulot iyong pawiin
Bumalik ka na’t muli akong mahalin
Ikaw ang tanglaw ko sa mundong madilim
Kay hirap mabuhay nang ‘di ka kapiling
Nasaktan akong labis nang iyong iwanan
Paggulong ng luha’y ‘di ko mapigilan
Bumalik ka’t halik labi ko’y dampian
Pighati sa puso ko’y iyong tuldukan
(Mula sa awiting “Unbreak My Heart” ni Toni Braxton)
AKO’Y LAYUAN
Humakbang kang palayo sa akin
Kinabukasan mo’y h’wag sirain
Pag-ibig mo sana’y h’wag sayangin
Mahalin ka’y ‘di ko pwedeng gawin
Ang maging tayo’y isang pangarap
Na ‘di kaylan man pwedeng matupad
Ang ibigin kita’y ‘di marapat
Dahil sa dusa ka masasadlak
H’wag kang lumuha, h’wag mong damdamin
Nais ko ma’y ‘di pwedeng pilitin
Masakit ma’y dapat na tanggapin
Hindi ka pwedeng hagka’t yakapin
Bakit nang dumating ka’y huli na
Hindi na malayang ibigin ka
Kung noon sana tayo nagkita
Kuwento nati’y naging masaya
H’wag ka nang sa aki’y magpaalam
Baka kasi kita pa’y pigilan
Humayo ka na’t ako’y layuan
Pagsikapan mong ako’y kalimutan
Paglayo mo’y aking daramdamin
Pagluha’y mahirap na pigilin
Matapos kasing ako’y ibigin
Tinulak kang palayo sa akin
(Mula sa kantang “Walk Away” ni Matt Monro)
PWEDE BA
Nakakamanghang kahit ano ang gawin
Sukdol man sa langit kung kita’y mahalin
Bakit pag-ibig ko tuwing susukatin
Sisidlan mong gamit ‘di kayang punuin
Naglahong muli sa yakap mo ang higpit
Maging sa halik mo’y nawala ang init
Kung hinahangad mo na muling umalis
Samo’y sa pakiusap ika’y makinig
Bago sana kita muling palayain
Pwede ba nating pagsikapang alamin
Bakit ningas-kugon ang pag-ibig natin
Ayaw magluwat ang alab sa damdamin
Ngunit bakit nais mong ako’y iwanan
Kung sa makalawa’y muling babalikan
Pwede ba kasing aminin mo na lamang
Ligayang hanap mo ako ang may tangan
Pwede bang sa akin ay iyong aminin
Sobra bang mahigpit kung kita’y yakapin
May pagkukulang bang dapat kong punuin
Kung may nais sabihi’y h’wag nang kimkimin
Palabas sa pinto hirap kang humakbang
Dahil ang nais mo kita ay pigilan
Humarap ka’t mata ko sana’y titigan
Lumapit ka…yakapin ako at hagkan
Usapang ito’y h’wag na nating pagtagalin
Pwede namang atin na lamang tanggapin
Ang magkalayo’y ‘di natin kakayanin
Kaylangan kita’t ako’y kaylangan mo rin
(Mula sa awiting “Just Once” ni James Ingram)
M.A.D. LIGAYA
M.A.D. L I G A Y A 