Dalampasigan mo’y nagsilbi kong sahig
Pader ang mga bundok mong nakapaligid
Kisame ko’y ang maaliwalas mong langit
Kita’y kanlungan mutya kong Bagong Tubig

Ikaw ang lumilok sa mura kong isip
Nagpatatag sa walang tibay kong dibdib
Dinig mo ang tibok ng una kong pag-ibig
Gabay sa pag-abot ng tala sa langit

Kandungan mo sumibol binhing pinagmulan
Iyong iniluwal lahing pinanggalingan
Lupa’t dagat mo kami’y biniyayaan
Paraisong inukit ng Diyos sa Batangan

Mutyang Bagong Tubig di kita nalimutan
Aba kong soneto iyong pagdamutan