Habang nagkakape hetong si mang Teban
Asawa’y lumapit… siya’y binatukan
“Hoy Teban, sino itong Anne ang pangalan?”
“Ano? Anne? Wala akong kilalang ganyan.”

“Hoy…hoy…hoy… ikaw na matandang hukluban,
Hay naku huwag kang magmaang-maangan,
O heto ang papel… Nakita ko iyan
Nang paborito mong brief ay aking labhan.”

“Ah… eh… Hay naku darling kabayo si Anne.”
“Eh bakit may numerong nakasulat d’yan?”
“Ha?… Kumbinasyon ito… aking tinayaan
Galing ako kahapon sa karerahan.”

Tumayo ang Teba’t misis hinalikan
“Naku darling kabayo’y huwag pagselosan.”
Dumukot pa ang dyaske ng limang daan
“Nanalo nga ako… balato mo iyan.”

Nang sikuhin s’ya ni misis, gulat ang loko
Anito’y “Tinawagan ko iyang numero,
Sumagot ang paborito mong kabayo,
Ang sabi’y – Come Teban sakyan mo ulit ako.”